教精你

唔同時期，都有唔同地方識嘅朋友同我講，話我對啲想博出位嘅人好sensitive，好易就覺得好反感。咁佢地又未至於叫我去撇甩呢個諗法，但我都必須對自己呢個諗法坦白。而其中一種我比較sensitive嘅人，就係一啲中意成日「教精你」嘅人。



你同佢地講一講下發生咩事，前文後理都未講完，佢地就會好熱心咁，擺出一副專家口吻，拋出好多理論話想幫你「解決問題」，即使你可能都試過，但唔work。又或者你想聽到嘅，係安慰同陪伴，而唔係尋求意見。


你真係聽佢講，事情解決左，佢地就會將成功歸因於佢地熱切嘅忠告。但你照做但都係唔成功，佢地總會有唔同理由去開脫，一係就係你冇跟足佢咁講，一係就你誤解左佢意思。總之公就我贏字就你輸。


如果佢地講嘅理論，前後一致都仲還好。但愈識得耐佢地，你就會愈發現，原來佢地同人講果套理論，喺自己身上做出嚟，又會係另一套。但你問返佢地點解會咁，佢地一係顧左右而言他，一係就用返身份地位去撻返你，總之就唔想你再咁多問題。


你知道，原來中西文化都有批判過呢啲「專家」。孟子曾經暗串過呢班人，話過「人之患在好為人師」，而聖經都講過「看不到自己眼前的樑木」，但你冇同呢班人講出口，一係佢地比你senior，無謂得罪影響仕途，一係佢地自尊心比較重。你有惻隱之心，唔想見到佢地發爛渣。


你睇得到呢度，一係就會覺得我鬧緊某一個人或者某一班人，一係就覺得我呢篇嘢都似教化緊人，係咪又自打咀巴。其實我都認自己有呢個tendency架，唔係又點會對呢類人咁sensitive呢係咪？